மரியாதைக்குரிய நண்பர்களே,வணக்கம்.
கொங்குத்தென்றல் வலைப்பக்கத்திற்கு தங்களை இனிதே வரவேற்கிறேன். இது இன்றைய தலைமுறையினருக்கான நினைவூட்டும் பதிவுங்க.
.. 
காலம் முற்றாக மறந்துவிட்ட
பெயர். மதுரை மேலூர் வட்டத்தில்
தும்பைப்பட்டி என்ற சிற்றூரில் தாழ்த்தப்பட்ட
குடும்பத்தில் கக்கன் பிறந்து நூறாண்டாகிறது.
பனித்துளியை
விடவும் பரிசுத்தமான மனிதர் கக்கன். பூசாரி
கக்கன் என்ற தோட்டிக்கு மகனாகப்
பிறந்து, வறுமையில் உழன்று, பெரும்பாடுகளுக்கிடையே பள்ளி இறுதிவகுப்பு
வரை படித்து முடித்துப் பொதுவாழ்வில்
ஈடுபட்ட புனிதர் அவர்.
சத்தியமூர்த்தி
காமராஜரை தழுவிக் கொண்டதுபோல், மதுரை
வைத்தியநாத ஐயர் கக்கனை வளர்ப்பு
மகனாக அரவணைத்துக் கொண்டார். மாசுமருவற்ற தோழர் ஜீவாவின் தலைமையில்
தான் கக்கனின் திருமணம் நடந்தது.
காந்தி 1934-ல் மதுரை வந்தபோது
அவருக்குத் தொண்டாற்றும் வாய்ப்பு கக்கனுக்கு வந்து சேர்ந்தது. காங்கிரஸ்
நடத்திய போராட்டங்களில் தீவிரமாகப் பங்கேற்ற கக்கன் 1942 ஆகஸ்ட் புரட்சியின் போது
மேலூர் காவல் நிலையத்தில் சிறை
வைக்கப்பட்டு 5 நாட்கள் கடுமையான கசையடிக்குள்ளானார்.
சுயநினைவு இழந்தவரை குதிரை வண்டியில் பாதம்
வைக்கும் இடத்தில் கிடத்தி, தலையும் கால்களும் தொங்கிய
நிலையில் இழுத்துச் சென்றதைப் பார்த்தவர்கள் விழிநீர் சிந்தினர்.
காமராஜருக்கு உண்மையும், நேர்மையும், இளமையும் நிறைந்த கக்கனிடம் பெருமதிப்பிருந்தது.
தான் முதலமைச்சராக ராஜாஜிக்கு பின் பொறுப்பேற்றதும், காமராஜர்
கக்கனைத் தமிழ்நாடு காங்கிரஸின் தலைவராக்கினார். தமிழ்நாடு கங்கிரஸின் தலைவராகப் பணியாற்றிய தாழ்த்தப்பட்ட இனத்தின் முதல் மனிதர் கக்கன்.
1957-ல் காமராஜர் மீண்டும் முதல்வரானதும் கக்கனுக்கு அமைச்சரைவையில் இடம் கொடுத்தார். தமிழகத்தில்
10 ஆண்டுகள் தொடர்ந்து அமைச்சராக இருந்த கக்கன் பொதுப்பணி,
உள்துறை, விவசாயம், உணவு, மதுவிலக்கு, அரசின
நலம், அறநிலையத்துறை போன்ற பல்வேறு இலாக்காக்களை
நிர்வாகித்தார்.
இவருக்குப் பின் எந்த தாழ்த்தப்பட்ட
இனத்தைச் சேர்ந்த அமைச்சரும் திராவிடக்
கட்சிகளின் ஆட்சியில் உள்துறை, பொதுப் பணித்துறை போன்ற
முக்கியமான இலாக்காக்களின் பொறுப்பை ஏற்றதில்லை.
பத்தாண்டுகள் மிக முக்கியத் துறைகளின்
அமைச்சராக இருந்த கக்கன் 1967 - தேர்தலில்
தோற்ற பின்பு சொந்தக் கூரை
கூட இல்லாத பரம ஏழையாகப்
பேருந்தில் நின்றபடி பயணித்தார். விடுதலைப் போராட்டத் தியாகத்துக்காக அவருக்குத் தனியாமங்கலம் என்ற கிராமத்தில் தரப்பட்ட
நிலத்தை, வினோபாவின் நிலக்கொடை இயக்கத்தில் ஒப்படைத்தார்.
முடக்கு நோயால் பாதிக்கப்பட்டவர்
கோட்டக்கல் சித்த மருத்துவமனையில் சேர்க்கப்படார்.
மருத்துவமனையில் பணம் செலுத்த முடியாத
நிலையில் நோய் தீராமலே அங்கிருந்து
விடை பெற்றார்.
மதுரை அரசு மருத்துவமனையில் சேர்க்கப்பட்டு
சாதாரண வகுப்பில் அவர் சிகிச்சை பெற்றபோது,
மதுரை முத்துவை நலம் விசாரிக்க வந்த
முதல்வர் எம்.ஜி.ஆர்.,
காளிமுத்துவின் மூலம் செய்தியறிந்து கக்கனைபோய்ப்
பார்த்தவர் அதிர்ந்து போனார்.
உடம்பில் ஒரு
துண்டு மட்டும் போர்த்திக் கொண்டு,
முக்கால் நிர்வாண நிலையில் இருந்த
கக்கனைக் கண்டு கலங்கி நின்ற
எம்.ஜி.ஆர். சிறப்பு
வார்டுக்கு மாற்ற உத்தரவிட்டபோது, ‘ வேண்டாம்
என்று மறுத்து விட்டார். ‘உங்களுக்கு
நான் என்ன உதவி செய்ய
வேண்டும் என்று கேட்ட எம்.ஜி.ஆரிடம், ‘நீங்கள்
பார்க்க வந்ததே மகிழ்ச்சி என்று
கைகூப்பினார் கக்கன்.
மனிதப் புனிதர் கக்கன் நாடாளுமன்ற
உறுப்பினாராக இருந்த போதும், தன்
மனைவி சொர்ணம் தொடக்கப்பள்ளி ஆசிரியையாகத்
தொடர்ந்து பணியாற்றுவதையே விரும்பினார். வலிமை மிக்க, அமைச்சராக
அவர் வலம் வந்தபோது தன்
மகள் கஸ்தூரிபாயை மாநகராட்சிப் பள்ளியில் தான் படிக்கச் செய்தார்.
தன் தம்பி விஸ்வநாதனுக்கு தாழ்த்தப்பட்டோர்
நலத்துறை இயக்குநர் லயோலா கல்லூரிக்கு அருகில்
ஒரு கிரவுண்ட் மனையை ஒதுக்கீடு செய்து
அரசாணையை அளித்த செய்தியறிந்த கக்கன்,
அந்த ஆணையை வாங்கிக் கிழித்தெறிந்தார்.
இன்று அந்த இடம் 50 லட்சத்துக்கு
மேல் பெறும். எளிமையின் வடிவமாக
நேர்மையின் விளக்கமாக நம்மிடையே வாழ்ந்து மறைந்த கக்கன் உடல்
கண்ணம்மாபேட்டையில் டிசம்பர் 24, 1981 அன்று எரியூட்டப்பட்டது. அவருக்குத்
தனியாக ஒரு சமாதி வைக்கவில்லை
நாம். ‘இன்று கக்கனை யார்
நினைக்கிறார்கள்? அவர் செய்த ஒரே
பாவம் தாழ்த்தப்பட்டோர் காலத்தில்.. அதுவும் தோட்டி மகனாகப்
பிறந்ததுதான். பார்த்தால் பாவம், தொட்டால் தீட்டு
என்னும் வர்ணாசிரம அகராதியில் அவர் ஆழக்குழி தோண்டிப்
புதைக்கப்பட்டார். பத்தரை மாற்றுத் தங்கம்
– புடம்போட்ட கக்கனை விட உயர்ந்தவர்கள்
தமிழகத்தில் இதுவரை எவருமில்லை. இனியும்
பிறக்கப் போவதும் இல்லை. இது
சத்தியம்!.
இவர் போன்றே டாக்டர் அம்பேத்கார் அவர்களது வாழ்க்கைச்சூழலும்.டாக்டர் அம்பேத்கார் அவர்கள் மத்தியபிரதேசம் மாநிலம் அம்பேவாதே என்னும் கிராமத்தில் மகர் என்னும் பழங்குடி இனத்தைச்சேர்ந்த மாலோஜி சக்பால் மற்றும் பீமாபாய் ஆகியோருக்கு பதினான்காவது குழந்தையாக ஏப்ரல் மாதம் 14-ந்தேதி 1891-ஆம் ஆண்டு பிறந்தார்.தீண்டாமைக்கொடுமை மற்றும் வறுமைநிலைக்கிடையில் ஒரு பிராமண வகுப்பை சேர்ந்த ஆசிரியரான மகாதேவ அம்பேத்கார் என்பவரின் ஆதரவில் படித்து முன்னேறினார்.பின்னர் ஒரு பதிவில் விரிவாக படிக்கலாம்.நன்றிங்க.
பதிவேற்றம்;-
சிபிசாரதி
நுகர்வோர் நலன் மற்றும் சாலை பாதுகாப்பு இயக்கம்.
தமிழ்நாடு-இந்தியா
